बीबीसी । विश्व स्वास्थ्य संगठन (डब्ल्यूएचओ)ले कोभिडका कारण यूरोप र एसियाका केही भागमा आउँदो मार्चसम्म थप सात लाख मानिसको मृत्यु हुन सक्ने चेतावनी दिएको छ । 

डब्ल्यूएचओले यूरोप क्षेत्रमा राखेका ५३ देशमा कोभिडका कारण १५ लाख भन्दा बढी मानिसको मृत्यु भइसकेको छ । 

सन् २०२२ को मार्चसम्म तीमध्ये ४९ देशका सघन उपचार कक्षमा ‘उच्च वा चरम’ दवाब हुने डब्ल्यूएचओको चेतावनी छ । 

यूरोपले बढ्दो कोभिड संक्रमणको सामना गरिरहेको छ । संक्रमण बढेपछि अष्ट्रिया पूर्ण लकडाउनमा फर्किएको छ । अन्य देशले पनि ताजा मापदण्डको बारेमा योजना बनाइरहेका छन् । 

फ्रान्स, जर्मनी र ग्रीस लगायतका थुप्रै देशहरूले चाँडै नै बुस्टर मात्रा पनि लगाएकालाई पूर्ण खोप लगाएको मानिने व्यवस्था गर्न लागेका छन् । 

तर, नयाँ मापदण्डको विरुद्धमा थुपै्र देशमा व्यापक विरोध भइरहेका छन् । नेदरल्याण्डले आंशिक लकडाउन गरेपछि केही रात हिंस्रक प्रदर्शनहरू भएका थिए । 

डब्ल्यूएचओको प्रतिवेदनमा यूरोप क्षेत्रमा कोभिड मृत्युको मुख्य कारण बनेको बताइएको छ । 

“अहिलेको प्रवृतिको आधारमा अर्को बसन्तसम्म कुल मृत्यु २२ लाख पुग्ने अनुमान गरिएको छ”, डब्ल्यूएचओले बताएको छ । 

पुष्टि भएका कोभिड सम्बन्धी मृत्यु हालै दोब्बर भएर दैनिक लगभग ४२ सय पुगेको छ । रुसमा मात्रै दैनिक १२ सय जनाको मृत्यु भइरहेको छ । 

खोप नलगाएका मानिसको ठूलो संख्या र केही देशमा डेल्टा भेरियन्टको कारण मृत्यु दर बढेको डब्ल्यूएचओले बताएको छ । 
डब्ल्यूएचओका यूरोप निर्देशक डा. हान्स क्लुगले खोप नलगाएकालाई लगाउन आग्रह गरेका छन् । 

“अनावश्यक वियोग र जीवनको क्षति एवं यो हिउँदमा समाज र व्यवसायमा हुनसक्ने थप संकटलाई रोक्न सहयोग गर्नु हामी सबैको अवसर र जिम्मेवारी छ”, उनले भने । 

डब्ल्यूएचओको यूरोप क्षेत्रमा यूरोपेली राष्ट्रहरूका साथै इजरेल, ताजिकिस्तान र उज्बेकिस्तान जस्ता देशलाई राखेको छ ।