एल आर ढकाल, अछाम

जिल्लाको विनायक पञ्चदेवल विनायक नगरपालिकाले एक महिना यता भारतबाट फर्किएकाहरुको विवरण संकलन गर्ने भएको छ । कोरोना भाईरसको माहामारी पुनः बढ्दै गएपछी नगरले विवरण संकलन गर्ने निर्णय गरेकोे हो ।

बुधबार बसेको नगरपालिकाको संकट व्यावस्थापन समितिको बैठकले विवरण संकलन गर्ने निर्णय गरेको हो । एक महिना यता भारतबाट फर्किएका सबैजनाको विवरण संकलन गरेर उनिहरुको अवस्थाका बारेमा जानकारी लिने जनाईएको छ ।

उनिहरुको स्वास्थ्य अवस्थाका बारेमा जानकारी लिन र कसैलाई स्वास्थ्य समस्या भएमा कन्ट्याक्ट ट्रेसिङ गर्न सजिलोको लागी उक्त निर्णय भएको नगरपालिकाका कार्यालय प्रमुख पदम बहादुर माझीले बताए ।

नगरप्रमुख देवराज देवकोटाको अध्यक्षतामा भएको बैठकले बेलखेतमा हेल्प डेस्क स्थापना गर्ने र जिल्ला प्रशासन कार्यालय अछामले गरेका निर्णयहरु पालना गर्ने निर्णय गरेको हो । बैठकमा छलफलका क्रममा उप प्रमुख अम्बिका चलाउनेले कोभिडबाट बच्नको लागी स्वास्थका मापदण्ड पालना गर्न गराउन सहभागी सबैमा अपिल गरिन ।

उनले संक्रमण कम गर्न सबैले भुमिका बढाउनु पर्ने धारणा राखिन । बैठकमा राजनैतिक दल, नेपाल पत्रकार महासंघ र बजार विकास समितिका पदाधिकारीहरुको सहभागिता रहेको थियो ।