प्रदेश नं. २

छठको आज तेस्रो दिनः चन्द्र पूजापछि सूर्यपूजामा जुटे ब्रतालु

जनकपुर । मुख्यतया सूर्यको पूजा हुने जस्तो देखिए पनि चन्द्र, अस्ताउँदो सूर्य र उदाउँदा सूर्यलाई एकसाथ अराधना हुने पर्व हो छठ । छठ पर्व मनाउने विधि र परम्परालाई नियाल्ने हो भने यो पूर्णतया प्रकृतिमा आधारित छ ।  सूर्य र चन्द्रको पूजा हुने तथा पूजा सामग्रीको रुपमा कृषि उपज सामग्री प्रयोग गरिने हुँदा छठ पर्वलाई प्रकृति पूजाको रुपमा पनि लिन सकिन्छ । चार दिनसम्म विभिन्न विधि र प्रक्रिया अवलम्बन गरी मनाइने यो पर्व सन्तान प्राप्ति, स्वास्थ्य लाभ, पारिवारिक सुख र समृद्धिका लागि मनाउने गरिएको ब्रतालुहरु बताउँछन् ।

छठ पर्व मनाउने ब्रतालुहरुले बुधबार नहायखाय गरेका छन् । पवित्र जलासयमा स्नानगरी चोखो खानेकुरा ग्रहण गर्ने विधिलाई नहायखाय भनिन्छ । छठ पर्वमा नहायखाय विधि पनि महत्वपूर्ण मानिन्छ । 

बिहीबार खर्ना मनाइएको छ । खर्नामा सूर्यास्तपछि चन्द्रमाको दर्शन गरी चामल, दूध र सख्खर हालेर पकाइएको खिर तथा फलफुलको प्रसाद चढाइन्छ । खर्नाको दिन बिहानैदेखि उपवास बसेका व्रतालुले साँझ चन्द्रमाको दर्शन गरी पूजापाठपछि सोही प्रसाद (नुनको प्रयोग नभएको) खाएर पर्सीपल्ट बिहान उदाउँदो सूर्यलाई अर्घ नदिएसम्म उपवास बस्ने विधि छ । 

खर्ना सम्पन्न भएदेखि नै शुक्रबार साँझ अस्ताउँदो सूर्यलाई दिइने अर्घको तयारीमा ब्रतालुसँगै परिवारका सदस्यहरु जुटेका छन् । जनकपुर र वीरगन्जलगायत सहरी क्षेत्रमा बिहीबारै राति नदी, तलाउ र सरोवरहरुको घाटमा पूजा सामग्री राखिइसकेको छ भने ग्रामिण भेगमा शुक्रबार दिउँसो घाटमा पुग्ने तयारी हुँदैछ । शनिबार बिहान उदाउँदै गरेको सूर्यलाई व्रतालुले फलफुल लगायत पूजा सामग्री लिएर अर्घ चढाएपछि व्रतालुहरु घर फर्केर सात्विक भोजन गरी विधिवत रुपमा पर्व समापन गर्नेछन् । 

प्रतिक्रिया दिनुहोस !

सम्बन्धित खबरहरु

सुदूरपश्चिमबाट बैतडीका चन्दलाई राष्ट्रिय युवा प्रतिभा पुरस्कार प्रदान गरिने
सेती लोकमार्गमा पर्ने ९ हजार ६ सय रुख काट्न वन मन्त्रालयको अनुमति
बालविवाह अन्त्य गर्न सके महिला हिं’साको पाटो रोकिन्छ : सांसद बोगटी
कमलबजार प्रयोगशालामा गरिएको परिक्षणमा अछामका २ सहित ७ जनामा कोरोना संक्रमण