अछाम – पञ्चदेवल विनायक नगरपालिकामा १८ सय व्यक्ति बेरोजगार सूचीमा सूचीकृत भएका छन् । रोजगार सेवा केन्द्रको व्यवस्थापन सूचना प्रणालीमा यस बर्ष उक्त संख्यामा बेरोजगार सूचीकृत भएको जनाइएको छ ।

मंगलबार बसेको नगर कार्यपालिका बैठकमा बेरोजगार सूची अनुमोदन भएको हो । प्रधानमन्त्री रोजगार कार्यक्रम अन्तर्गत न्यूनतम रोजगारीका लागि गत साउन ८ गतेदेखि भदौ ७ गतेसम्म आवेदन अाव्हान गरिएको थियो ।

बेरोजगार व्यक्तिले आफ्नो वडा कार्यालयमार्फत बुझाएको आवेदन फाराम रोजगार सेवा केन्द्रमा रहेको सूचना प्रणालीमा प्रविष्ट गरिएको र सोही आधारमा हुने प्राथमिकीकरण अनुसार यस बर्ष पनि रोजगारी दिइने सेवा केन्द्र स्रोतले जनाएको छ ।

आ.व. २०७७/०७८ का लागि ५१ लाख ७० हजार बजेट प्राप्त भइसकेको र थप बजेट आउने प्रक्रियामा रहेकोले अब तिहारलगत्तै काम सुरु गरिने रोजगार संयोजक भरतराज अधिकारीले बताए । उनका अनुसार यसबर्ष रोजगारीमा संलग्न हुने हरेक व्यक्तिले पुरै १०० दिन काम पाउनेछन् ।

कार्यक्रमको बजेटबाट कामका लागि पारिश्रमिकमा आधारित सामुदायिक पूर्वाधार निर्माण तथा मर्मतका आयोजनाहरु सञ्चालन गर्ने तयारी नगरपालिकाले थालेको छ । श्रमिकले बैंक खातामा ज्याला भुक्तानी पाउने र सानो बजेटमा पनि प्रभावकारी योजना हुने हुँदा पछिल्लो समय प्रधानमन्त्री रोजगार कार्यक्रम लोकप्रिय बन्दै गएको छ ।

यस नगरपालिकामा गत आर्थिक बर्षमा ५ वटा सामुदायिक आयोजना सञ्चालन भएको र त्यसमा २ सय २३ जनाले रोजगारी पाएका थिए । यसबर्ष नगरका सबै वडामा निर्माण र मर्मत योजनाको सञ्चालन मार्फत् ठूलो संख्यामा रोजगारी सिर्जना गर्ने लक्ष्य रहेको नगरपालिकाले जनाएको छ ।