काठमाडौं– इन्डियन प्रिमियर लिग (आईपीएल) अन्तर्गत बुधबार राति भएको खेलमा जित निकाल्दै साबिक उपविजेता दिल्ली क्यापिटल प्लेअफ नजिक पुगेको छ।

बुधबार रातिको खेलमा सनराइजर्स हैदारबादविरुद्ध ८ विकेटको जित निकाल्दै दिल्ली प्ले अफ नजिक पुगेको हो।

खेलमा टस जितेर ब्याटिङ रोजेको हैदराबादले पुरा ओभर खेल्दै ९ विकेटको क्षतिमा १३४ रन बनाएको थियो। जवाफी ब्याटिङमा १७ दशमलव २ ओभर खेल्दै दुई विकेट गुमाएर दिल्लीले लक्ष्य पुरा गर्‍यो।

दिल्लीका लागि शिखर धवन र श्रेयस अयरले ५२ रनको साझेदारी गरे। धवनले ४२ रन बनाए भने अयरले ४७ रनको योगदान दिए। बलिङतर्फ राशिद खान र खलिल अहमदले समान १–१ विकेट लिए।

त्यसअघि ब्याटिङमा आएको हैदराबादका अब्दुल रहमले २८, राशिद खानले २२ र केन विलियम्सनले १८ रन जोडे। दिल्लीका कागिसो रबडाले तीन विकेट गिराउँदा एनरिच नोर्किया र अक्षर पटेलले समान २–२ विकेट लिए।

यो जितसँगै शीर्षस्थानमा पुगेको दिल्लीले ९ खेलबाट १४ अंक जोडेको छ। अक्सर आईपीएलमा आठ खेल जित्ने टिम प्लेअफमा पुग्ने गर्दछ। यता हैदराबाद भने दुई अंकका साथ तालिकाको पुछारमा छ।