काठमाडौं । नेपालगन्ज म्याराथनको विजेताले पुरस्कारबापत यो वर्ष ७५ हजार रुपैयाँ पाउने भएको छ । मंसिर पहिलो साता आयोजना हुने धारा छैटौं नेपालगन्ज म्याराथनको विजेताले पाउने भएको आयोजक क्रिएटिभ ह्यान्ड्स तथा क्रियटिभ गन्ज मिडिया एन्ड इभेन्ट्सले शनिबार एक विज्ञप्ति निकाल्दै जनाएको छ ।

आयोजकले अघिल्लो संस्करणभन्दा यो संस्करणको पुरस्कार राशि बढाएको जनाएको छ । यसपटक म्याराथनका विजेताले ७५ हजार, दोस्रोले ३० हजार, तेस्रोले १५ हजार रुपैयाँ प्राप्त गर्नेछन् । त्यस्तै चौथोले १०, पाँचौंले ८, छैटौंले ७, सातौंले ६ र आठौं हुनेले ५ हजार रुपैयाँ पाउनेछन् ।

विजेताले गत वर्षको तुलनामा २० हजार रुपैयाँ बढी पाउने बताइएको छ । त्यस्तै महिला हाफ म्याराथनको विजेताले ३०, दोस्राले १५, तेस्रोले १० हजार रुपैयाँ प्राप्त गर्नेछन् । त्यस्तै चौथोलाई ७, पाँचौंलाई ६ र छैटौं हुनेलाई ५ हजार रुपैयाँ प्रदान गरिनेछ ।

नेपालगन्ज म्याराथनको पहिलो संस्करणमा नेपाली सेनाका होमलाल श्रेष्ठ, दोस्रोमा सेनाकै कृष्ण बस्नेत, तेस्रोमा जुम्लाका दुर्ग बुढा, चौथो संस्करणमा नेपाल पुलिस क्लबका भुमिराज राई र सेनाका नवराज साउद विजेता भएका थिए ।

त्यस्तै महिला हाफ म्याराथनमा नेपालकी नम्बर एक धाविका कान्छीमाया कोजु दुई संस्करणमा विजेता भइसकेकी छिन् । गत संस्करणमा सेनाकी पूर्णलक्ष्मी न्यौपानेले जितेकी थिइन् ।

नेपालगन्ज म्याराथन मंसिर ६ गते हुँदै छ । नेपाल ओलम्पिक कमिटी (एनओसी) ले नेपालगन्ज म्याराथनलाई ओलम्पिक छनोटका रुपमा समेत लिएको छ ।