काठमाडौं । भारतमा कोरोना संक्रमितको संख्या साढे १७ लाख नाघेको छ । विश्व स्वास्थ्य संगठनको तथ्यांक अनुसार भारतमा १७ लाख ५० हजार ७२३ जनामा कोरोना संक्रमण पुष्टि भइसकेको छ । 

भारतमा ३७ हजार ३६४ कोरोना संक्रमितको मृत्यु भएको छ । शुक्रबार भारतमा ५४ हजार ७३५ कोरोना संक्रमित थपिएका छन् भने ८५३ जनाको मृत्यु भएको छ । 

भारतमा कोरोना संक्रमितको संख्या तीव्र गतिमा फैलिरहेको छ । लकडाउन खुलेसँगै भारतमा कोरोना संक्रमितको संख्या अनपेक्षित रुपमा बढेको तथ्यांकले देखाएको छ । 

भारत सबैभन्दा धेरै कोरोना संक्रमित हुने देशकोे संख्यामा अमेरिका र ब्राजिल पछि तेस्रो स्थानमा छ । सबैभन्दा धेरै मृत्यु हुने देशको सूचिमा भने छैटौं स्थानमा छ । 

विश्व स्वास्थ्य संगठनका अनुसार विश्वका २१६ देशमा फैलिएको कोरोनाका कारण हालसम्म ६ लाख ८० हजार ८९४ को ज्यान गइसकेको छ । संक्रमितको संख्या १ करोड ७६ लाख ६० हजार ५२३ पुगेको छ ।